كتب و تاريخ | دم الخلفاء

 

ركن الفائدة 💛 | المقال رقم (4)

سلسلة القراءة حياة - المقدمة

حبايبنا متابعي جديان أسعد الله أوقاتكم بكل خير..

في مساحتي دي ح اقدم ليكم أُسبوعياً شرحاً وافياً لكتب من اختياركم😎

طيب مبدئياً نتكلم عن فائدة القراءة..

م تخافوا ما ح أقول ليكم تنمي المخزون اللغوي والمعرفي ومدري إيش 

"جملة حلوة صح😂❤️"

مستعدين نواصل!؟

كتير منكم منظوره الفكري تجاه القراءة إنها مملة 🥲

لكن هل انت عارف إنها من أهم أسباب التطور و في كل المجالات؟

مش كدا وبس كمان بتزيد معدل الذكاء و برضو بستخدمها أطباء النفس كعلاج إضافي في تحسين الصحة النفسية، وفوائد أخرى لا تُعد..

-طيب كيف ممكن الكُتب تغير الإنسان ومفهومه وتجعله أكتر ذكاء وهل التأثير سريع ولا بطيئ؟

 ماف كتاب محدد بقدر يغيرك أو يجعلك أكثر ذكاء، لكن لما تقرأ كتاب ورا التاني ح يحصل التغير ..

تخيل معي إنك عايز تبني بيت ح تبدأ ب طوبة طوبة وفي النهاية النتيجة منزل جميل..

برضو ينطبق الأمر على الاستفادة من الكتب..

طيب ح أشرح ليكم برودكاست *"تهذيب النفس"* للدكتور ياسر الحزيمي..

يحلوين د.ياسر اتناول كم محور ح اديكم الزبدة بتاعتهم زيي الكأنك سمعته بالتفصيل ..

◇في مقدمة البرودكاست ذكر جملة مهمة جداً " النقد وقود فلا تجعله يقود"

قبل أواصل ✋ ركز في الجملة وحاول أفهم عمو ياسر كان قاصد شنو..

كلنا بنتناول النقد من الجانب السلبي فقط..

- وهل عندو جانب إيجابي !؟

=أيوا في جانب إيجابي 

دكتور ياسر كان عايز يقول ليك ياجميل 

"إجعل نقد الآخرين لك فائدة تساعدك على تطوير ذاتك ولا تجعله قائد لسلوكك"

طيب ناخد مثال 🤏🏼

إذا مرّ عليك شخص وانتقدك، "أنت لا تجيد فعل كذا" ..

في الحالة دي ح يكون سلوكك شنو ؟

• تأخذ النقد بصورة ايجابية وتبدأ في تطوير نفسك لتصبح شخص جيد جداً عشان رضى نفسك م عشان كلام الناقد..

•تستسلم للنقد وتلبث مكانك..

دي الفكرة من إجعلها وقودك ولا تجعلها تقودك..

 

◇دكتور ياسر قال ليك كُن 🔺 ولا تكن 🔴

-طيب الفرق شنو!؟

= الدائرة: كدا انت ح تفضل ف حلقة مغلقة ح تدحرج من مكان لمكان وتفاصيل كتير وللأسف ح تكون راضي 

حتفضل زيي الكورة كلما ضُربت أكتر رجعت أسرع..

مثلاً شخص سخر منك ح تزعل وترجع له تاني، ليه ترجع وليه تسمح إنه يسخر منك أصلاً🌝💔

طيب نجي للمثلث الجميل:

المثلث فيه زواية يعني تقدر تضع حدود ف التعامل وتقدر تفرق بين الضعف واللين وبين حُسن الخُلق وبين كونك شخص طيب بزيادة "إمِّعة"

بين الضعف والتواضع..

يعني تقدر تتحكم ف حياتك ومتين تكون أي صنف حسب ما يستلزمه الموقف..

◇في مقولة حلوة كمان اتناولها البرودكاست " إسمع لقولي ولا تنظر إلى عملي، ينفعك عملي ولا يضرك تقصيري"

بالعربي كدا😂

 م شرط اني اقول ليك أقرأ الكتاب الفلاني وأكون أنا قريته، والأمر ينطبق على تفاصيل كتيرة..

"في المرتبة الأُولى الإنسان القدوة هو اللي ينصح بما يعمل به

لكن في المرتبة الثانية يأتي الصنف الذي نتحدث عنه "

مثلاً إذا ما نهى الواعظين الناس إلا بالأشياء التي لم يفعلوها، فلن يعظ العاصين أحد بعد النبي صلى الله عليه وسلم.. 

◇فاقد الشيئ لا يعطيه الجملة دي تنطبق على الأمور المادية فقط ..

مثلاً إذا طلبت منك فلوس وانت ما معاك كيف ح تديني ليها ؟!

لكن في الأمور المعنوية تنطبق مقولة "فاقد الشيئ يعطيه وبشدة"..

مختصر الفقرة دي مثلاً إذا انت مدخن دا ما بيمنعك تنهي الآخرين عن التدخين🌝

◇ اختتم البرودكاست بتعريف الكمال لإبن القيم

" الكامل هو خير الرجال، الكامل في نفسه المكمل لغيرة" 

عزيزي القارئ اختار كتاب عشان نبدأ بيه أول عتبة في التغير والكتب هي:

•من حرّك قطعة الجبنة الخاصة بي

•القواعد السبع للناس الأكثر فعالية

• كيف تؤثر على الآخرين وتكسب الأصدقاء ..

أتمنى اني م أكون طولت عليكم الشرح وأتمنى كمان يكون ممتع ومفيد..

شكراً لوقتكم الثمين

بقلم الكاتبة / هناء عبدالغفار

ركن الفائدة 💛

منصة جديان التعليمية