كتب و تاريخ | دم الخلفاء

 

ركن الفائدة 💛 | المقال رقم (5)

العمل الحر - الجزء الاول 

المقال قد يكون طويل شوية بس حيكون مفيد لكتير من الناس 😊 وحيكون على جزءين إن شاء الله 

نسبة لأوضاع بلدنا المارين بيها الناس يمكن تطول فترة قعدتها في البيت عشان كده بدل ما تكون قعدة من غير فائدة ممكن نقدم حاجات تفيد غيرنا ولو حتى بقت ليهم معلومة ورصيد معرفي فكتير من الناس بسمعو بكلمة الفريلانسر وكتير منهم ما واضح ليهم معناها 

حأذكر ليكم بعض النصائح والقواعد والفوائد في مجال الفريلانس وكمان كلها تجارب من التجارب المريت بيها من يوم دخلت المجال ولحدي اليوم

⭕ مبدئياً ياعزيزي لما تقرر تبقى فريلانسر لازم تعرف أنو الخطوة دي زي ما حتكون ليك مفتاح نجاح وبوابة خير ورزق كمان حتواجهك عقباات وتحديات فلازم تلتزم بطول البال وتتحلى بالصبر 🍂✨

والحاجه دي لو حتبقى مصمم جرافيك أو حتى باقي المجالات المتاحة في العمل الفريلانس

🔸️طيب يعني شنو فريلانس 🤔؟

فريلانس يا سيدي معناها : ( عمل حُر ) بمعنى القواعد البتحكم الوظيفة دي إنت البتختها وإنت البتكون سيد نفسك في تنفيذها والإلتزام بيها . والعمل الحر بكون تحديد زمن العمل وسعر العمل من خلال حساباتك لجهدك المبذول في تقديم الخدمة اللي حتتخصص فيها ☺️👌🏼

وبصورة تانية وأوضح وبتعريف علمي عن الفريلانس : هو تقديم خدمه لشخص أو جهة ما مقابل عائد مادي للخدمة ، الخدمة اللي حتقدمها من خلال إطلاعك عليها وخوضك فيها قد تكون فيها مهارات مكتسبة او فطرية .

🔸️المصطلحات المتعلقة بالفريلانس هي :

_ ( عميل وهو طالب الخدمة ) 

_ ( مقدم الخدمة وهو شخصك الجميل ) 

_ ( ديدلاين أي زمن تسليم المطلوب منك )

_ ( تكلفة الخدمة وهي العائد المالي المُتفق عليه )

 

🔺️العمل الحر بتيح ليك أنك تشتغل في أي وقت وفي أي مكان وركززز على حكاية أي وقت أي مكان 

🔸️أما بالنسبة لبعض النصائح اللي ممكن تكون أساسية ومهمة ومشتركة في كل المجالات حقت الفريلانس فهي كالتالي :-

_ إنت بتكون رئيس نفسك 

_ في إمكانك تقول ( لأ ) عادي عادي من غير ما تتعرض لكبت في حرية التعبير زي ما بحصل في العمل تحت مظلة المؤسسة أو الجهة المعينة

_ لو حاجه ما عجبتك أو عاوز تزيد سعرك بتقول عادي 

_ لازم تخت حدود في علاقات الشغل

_ بتخت مواعيد ثابتة لشغلك وأنك تكون أونلاين فيها بس ودي البتنظم ليك شغلك وحياتك وبتساعدك في مواكبة العالم الخارجي في النشاط والإنتعاش حق السوق العالمية 😉👌🏼

_ بلاش تضغط نفسك وتهلك روحك في الشغل لأنك حتُستهلك وبعدين حتكره نفسك والشغل 

_ لما ترتب نفسك وتبدأ بصورة صحيحة وتنتظم في الشغل ما تساهر في الشغل لأنو مع مرور الوقت حيبقى ليك عادة 

_ ما تشتغل في الإجازات الرسمية على حسب كل دولة لأنو حتبقى ليك عادي وبكده لو جا زمن إجازتك إنت يمكن يصادف هناك يوم عادي فحتكون ملزم تسيب إجازتك عشان خاطر تأدي الخدمة المطلوبة منك فبكده حتحرم نفسك من رفاهية من حقها أنها تعيشها 👌🏼

_ أدي نفسك إذن سماح بالراحة وأنك تأخد إجازة كل فترة لأنها حتساعدك تغير من مودك وتخلي حياتك مليانة تجديد 

_ أطلب المرتب أو المقابل اللي إنت بتشوفو مناسب معاك وبتستحقه بناءاً على خبراتك وقيمة شغلك 

_ ما تشتغل مجاناً مهما كان الزول اللي طالب منك الخدمة أو الشغل

_ خليك مواصل في أنك تعلم نفسك لأنو المجال البتختاره ما على كده وبس وقف ☝🏻 لأنو كل يوم والتاني بزيد تطور وبتجدد شيئاً فشيئاً 👌🏼

_ شارك بالمعلومات والمعرفة اللي عندك وماتخاف لأنو ماف زول حيشيل حاجه من نصيبك وقسمتك حتجيك أكيد والمثل السوداني بقول ( قسمة زول مابشيلها زول ) 🫰🏼

_ أنشر شغلك كل فترة في مواقع التواصل والمواقع المخصصة عشان تبني قاعدة جماهيرية وتكتسب إسم ومعرفة في سوق العمل 

_ لما تبقى فريلانسر أطلع إشتغل برة البيت وفي أماكن مختلفة عشان تغير موودك وتبدع أكتر 

_ خلي علاقاتك مع أصحابك وزملاء العمل حلوة ولطيفة عشان لو جاء يوم وإحتجت ليهم في مساعدة أو لدعم أو ترشيح ليهم لشغل الجو يكون مهيأ ويكون بينكم تعامل ظريف 

_ أعرف حقوقك كويس قبل ما تبدأ أي شغل كمثال المبلغ المتفق عليه حتستلمو متين وكيف ووين ، وهل حتأخد جزء من المبلغ في بداية شغلك ولو إحتجت لإجازة حتقول قبلها بكم من الزمن ، والحاجات دي بتختلف من مكان للتاني 

_ إنت شخصية مستقلة بذاتها وتجربتك بتختلف عن أي زول تاني حتى لو كان في نفس مجال شغلك أو مستواك فأوعى تسمح لزول ولا انت تقلل من نفسك او من تجربتك

⭕وأعيد وأذكرك يا سيدي أنك ما حتغنى وتلقى قروش بين يوم وليلة وإنما حتحتاج فترة زمنية بتحددها إنت وعلى ضوئها بتجتهد لحدي ما تعبر وتحققها ☺️

🔸️الفائدة اللي ممكن نستفيدها من العمل الحُر ( الفريلانسنج )

1. تحقيق الإستغلالية الذاتية للنفس ( إستغلالية في آداء العمل بلا مدير أو آمر أو ناهي لأنك بتقوم بكل الأدوار هنا ) ☝🏻

2. تقديم الخدمة في الوقت والمكان المناسبين من خلال إختيارك لهما طبقاً للظروف الملائمة لك ☺️

3. سهولة الوصول للأسواق العالمية ومواكبتها 😌🔥

4. تحقيق دخل مناسب ولائق وفقاً لإجتهادك وذكائك إضافة لتحقيق الصرف بالعملة العالمية اللي ممكن تزيد من عوائدك ☻💜

 ( لو رطبتو ماتنسوني بعدين ) 🤣

5. إكتساب مهارات جديدة وتطوير ذاتي في شخصك وزيادة خبرات في مجال عملك أو حتى في أي مجال آخر .

🔸️الخطوات اللي لازم نتبعها عشان ندخل مجال الفريلانس ....

1. إختيار المجال المناسب للبدء في العمل فيه سواء أكان ذلك عن طريق الموهبة أو الميول فإن كان ميولاً فهذا يساعد في الإكتساب بسرعة وإن كان موهبة فإن المواهب تُنمى وتتزدهر عن طريق التغذية العلمية المستمرة .

2. متابعة مواقع ومنصات الكورسات التعليمية الموسمية سواء المجانية أو المدفوعة ( علماً بأن رسوم الإشتراك تكون رمزية ) .

3. مجال العمل الحر من مميزاته أنك في معظم المجالات ما بتحتاج لشهادات ولكن في بعض الشركات العالمية قد يشترطوا عليك وجود شهادات أكاديمية 👌🏼.

4. أهم حاجه هي الإلتزام ثم الإلتزام ثم الإلتزام وضع خطاً على هذه الخطوة وضعها أساساً لك .

🔸️ من أهم المواقع والمنصات التي بتقدم كورسات ودورات في مجالات العمل الحر :

_ Udemy 

_ Lynda

_ skillshare

🔸️ من أهم مواقع العمل الحر اللي تقدر تم فيها خدماتك :

_ موقع خمسات Khamsat

_ موقع آب وورك Upwork

_ موقع فريلانس Freelance

_ موقع مُستقل Mostaqel

🔸️بالنسبة لبعض المجالات الممكن تتخصص فيها في العمل الحر على سبيل المثال لا الحصر :-

_ تصميم الجرافيك بمختلف مجالاته

_ كتابة المحتوى بمختاف أقسامه

_ التعليق الصوتي بمختلف أنواعه

_ الرسم بمختلف أنواعه

_ البرمجة بمختلف مجالاتها

_ الترجمة اللغوية

_ التسويق الناجح 

_ التصوير الفوتوغرافي وتعديل الصور الإحترافي بفتح تعاقد دولي

_ وغيرها منزالتخصصات والمجالات

⭕ حاجه آخيرة وبنعتذر على الإطالة 

مجال الفريلانس حلو شديد محتاج من الزول وقت طويل وأنو يضغط نفسه في التعليم والتطوير ومواكبة السوق اللي هو شغال فيه ولابد أنك تكون إنسان مبتكر ومبدع لو حبيت أنك تكتسح السوق العالمية وتبني ماركة عالمية خاصة بيك 🥰

وزي ما العمل الحر عندو إيجابيات في نفس الوقت عندو سلبيات وهي أنك ممكن وقتك كله ممكن يكون مخصص للشغل وده ممكن يعود لكثرة الكلبات من مختلف أنحاء العالم في اي وقت إضافة لأنك ممكن تواجه ركود في السوق بسبب حركة النشاط حقت السوق

فلما تقرر تدخل فيهو خت نية أنك تستمتع وتكتسب الخبرة وبعد كده أنا بوعدك بأنك ممكن تحقق أكبر قدر ممكن من الدخل الملائم والمحترم في مسيرتك المهنية 🥰

ربنا يوفقكم ويرزقكم من أوسع أبوابه يارب العالمين وكل ما تجتهدوا كل ما حتنجزوا وربنا يقويكم ويوفقكم يارب 

بقلم/ عمر بريمه 

ركن الفائدة 💛

منصة جديان التعليمية

JIDYAN PLATFORM